KCB Herbscht-Clubdippel am 16.10.2021

E Bricht vom Kurt Ott

Vo `Möhlin` zem Graftwärgg Ryburg und Rhyfälde.

Der Herbschtdibbel hetts wääge Corona 2020 nid gä, aber 2021 derfir wiider aine.

Dailnähmer sinn zweelf Lyt gsi, (nid alfabethisch). Wanderlaitere Noemi, Werner, Bea,Richi, Astrid, Peter, Silvia, Rosmarie, Roland, Claudia, Alex, Kurt und zwai Hind.

Unsere Dräff isch am 10.10 bim Glais drey bi bewelggtem Wätter im Basler Baanhoof SBB gsi. Do sinn die erschte siibe Kanuclibler in d`S 1 gschtiige, woo-n-is am 10.18 richtig Friggdaal brocht hett. In Brattele isch dernoo d`Silvia derzue ko, Am Bahnhoof `Möhlin` simmer uusgstiege, woo d`Wandrig under der Laitig vom Noemi aagfange hett. Zerscht simmer der Bahn entlang gloffe, woo`s im Nääbel gfooreni Spinnenetz am e Gaartehaag ka hett. Das isch zem fotografiere wunderbaar gsi. Denn isch me em Möhlin Bach uuf emme Meergelwääg nääbedraa gloffe. Denn wyter bi Sunneschyyn bim Campingblatz, der Glääraalaag und em Schwimmbaad duure, isch me an Rhy ko. Noo-n-e baarmool uff und ab mit hoche Stäägedritt isch der Raschtblatz bim Graftwäärg Ryburg uffdaucht. Deert hett d`Bea, s`Rosmarie, der Richi und Roland mit zwai Hind gwartet. Si sinn mit em Auti vo Bärn und Rynach aagraisst und sinn scho am Fyr baraad mache zem Glepfer breetle gsi. Do hetts e greeseri Begriessig gä. Denn hett me no me Holz gsuecht und sich gmietlig gmacht an dääre Grillstell mit Bängg und Disch. Unser Alex hett mit siine Kinscht s`fiechte Holz zem Brenne brocht. Mit der Zyt sinn d`Wirscht haiss woorde und me hett si gässe. Au anderi mitbrochte Aesswaare sinn verspiese woorde. Me hett ebbe e Stund Mittag gmacht und denn isch es langsam kiel woorde. Mir sinn wytter bim Graftwärgg duure, alles em Rhy entlang und au an ere reemische Waarte. Dernoo simmer zem neye Graftwäärgg Rhyfälde mit neyer Brugg ko. Das alte Graftwärgg isch s`erschte am ganze Rhy 1898 gsi, wäär historisch gsi, aber isch abbroche woorde. Es isch sittlig uff dytscher Syte und nid iberem Rhy gsi. Deert woo das alte Wärgg gsi isch, hett me e nadurierti Aalaag mit Fischdräbbe aanegschtellt. Denn isch me wyter em Bach entlang dibblet, nääbenem Kuurzentrum duure bis in d`Altstadt yyne. Dr Schryber hett vo dr Saline e letscht Kilomeeter der Bus gnoo, wääge de miede Gnoche. Deert hett me s` Kaffi Groonehoof gfunde mit emme Gäärtli bi fuffzää Graad und Sunneschyyn. Am vieri noo-n-ere halbschtund hett me sich vo de Autifaarer verabschiiedet und mir sinn an Baanhoof gloffe. Mit em 16.22 Zuug simmer uff Basel gfaare, usser s`Claudia und Alex, die hänn wäägenem Bilijee leese dä verbasst und hänn e näggscht gnoo. In Basel aakoo hett me sich verabschiidet. Der Noemi dangge mir fir dä dolli Herbschtdibbel bi ideallem Wätter.